ජනාධිපතිට බලයක් නෑ..පාර්ලිමේන්තුව කැඳවීමට සිදුවෙනවා !



කොවිඞ් ප‍්‍රශ්නය නිසා උද්ගතව ඇති මූල්‍ය අර්බුදයට විසඳුම් ලෙස රජය අර්ථසාධක අරමුදලෙන් මුදල් ගත්තද, විදේශ ණය මුදලක් ලබාගත්තද ඒ සඳහා ව්‍යවස්ථාවෙන් ජනාධිපතිවරයාට බලයක් නොමැති බවත්, ඒ සඳහා බලය තිබෙන පාර්ලිමේන්තුව කැඳවීමට සිදුවෙන බවත් හිටපු පාර්ලිමේන්තු මන්ත‍්‍රී ආචාර්ය හර්ෂ ද සිල්වා පවසයි.
වීඩියෝ මාධ්‍යයෙන් ප‍්‍රකාශයක් නිකුත් කරමින් ඔහු මේ බව පැවසීය.

මේ වන විට රජයේ ආදායම් අඩු වී, වියදම් වැඩිවී තිබෙන නිසා රජයේ වියදම් ආවරණය කිරීම සඳහා ණය ලබාගැනීමට සිදුවෙන බවත් අපේ‍්‍රල් 30 වැනිදා දක්වා බල පැවැත්වෙන, පාර්ලිමේන්තුවෙන් මිට පෙර සම්මත කර ඇති අතුරු සම්මත ගිණුමෙහි ණය සීමාවට වඩා වැඩිපුර ණය ලබාගැනීමට රජයට හැකියාවක් නොමැති බවත් ඔහු පෙන්වාදෙයි.

ඔහුගේ ප‍්‍රකාශය මෙසේය.
‘අපට ආරංචියක් ලැබිලා තියෙනවා කොවිඞ් ප‍්‍රශ්නය නිසා රජය අලූත් යෝජනාවක් ගෙනල්ලා තියෙන බව. රජයට මුදල් හිඟ නිසා භාණ්ඩාගාරයේ මුදල් නැති නිසා, වැඩකරන ජනතාව ඉතුරු කරන ලද ඔවුන්ගේ මුදල් හෙවත් අර්ථසාධක අරමුදලේ මුදල්වලින් සියට 25ක් එළියට අරගෙන ඒවා තැන්පත්කරුවන් අතරේ බෙදා දෙන බව කියා තියෙනවා.

රජය විශ්වාස කරනවා ඒ මුදල් ඇසුරෙන් අලූතෙන් ආයතන පටන්ගනීවි, අලූත් ව්‍යවසායකයන් බිහිවේවි, පරණ ණය ගෙවලා අලූත් ණය ගනීවී, ඒ හරහා ඉල්ලූම වැඩිවේවි කියලා.

මූලික ප‍්‍රශ්නය තමයි අර්ථසාධක අරමුදලේ භෞතික වශයෙන් සල්ලි නැති වීම. ඒකේ ඉතිරිකරලා තියෙන මුදල් රජය වෙනත් තැන්වල ආයෝජනය කරලා තියෙනවා. ඒ අතරින් සීයට අනූපහක් හෙවත් රුපියල් ටි‍්‍රලියන දෙකහමාරක් වන මුදල් ආයෝජනය කරලා තියෙන්නේ රජයේ බැඳුම්කර හා භාණ්ඩාගාර බිල්පත්වල. තවත් සීයට පහක් විතර කොටස් වෙළඳපොල ආදි තැන්වල ආයෝජනය කරලා තියෙනවා.

ඔවුන් යම්කිසි ප‍්‍රමාණයක් ඒ මුදල් නැවත සේවකයන්ට ලබාදෙනවා නම් ඒ මුදල් නැවත රජයෙන් ලබාගන්න ඕනෑ.

දීර්ඝකාලීනව හා මධ්‍යකාලීනව ණය වශයෙන් රුපියල් ටි‍්‍රලියන හතරහමාරක් විතර භාණ්ඩාගාර බැඳුම්කරවල තියෙනවා. ඒ ටි‍්‍රලියන හතරෙන් අතිබහුතරයක් හෙවත් ටි‍්‍රලියන දෙකයි කාලක් පමණ තියෙන්නේ අර්ථසාධකයේ මුදල්. රජය ඒ මුදල් අර්ථසාධක අරමුදලට නැවත නොදී ඒවා හිමිකරුවන්ට දෙන්නේ කොහොමද කියලා මට තේරුම් ගන්න අමාරුයි.

ඒ නිසා මේ යොජනාව ගැන නැවත සිතාබලන්න සිද්ධවෙනවා.
අනෙක් පැත්තෙන් රජයට විශාල අර්බුදයකට මැයි මාසය වෙනකොට මුහුණදෙන්න සිද්ධවෙනවා. ආණ්ඩුක‍්‍රම ව්‍යවස්ථාවට අනුව මේ අවුරුද්දට ගන්න පුළුවන් ණය ප‍්‍රමාණයෙහි රජයට දුන්න උපරිමයක් තියෙනවා. අතුරු සම්මත ගිණුමෙන් තමයි පාර්ලිමේන්තුව ඒ උපරිම සීමාව පනවලා තියෙන්නේ. ඒ උපරිමයට වඩා වැඩිපුර ණය ගන්න බෑ. ඒක ව්‍යවස්ථාවෙන්ම නියම කරලා තියෙන දෙයක්.

දැන් ආණ්ඩුවේ ආදායම් අඩුවෙලා. මීට කලින් බදු සංශෝධනයත් එක්ක සීයට විසිපහකින් විතර නොසිතූ ලෙස ආදායම අඩු වුණා. කොවිඞ්-19 ප‍්‍රශ්නයත් එක්න ශීඝ‍්‍රයෙන් ආදායම අඩු වුණා. දැන් වියදම වැඩි වෙනවා මිසක් අඩු වෙන්න හේතුවක් නෑ.

ඒ අනුව ආණ්ඩුවට මුදල් ඕනෑ. ඒ සඳහා අලූතෙන් මුදල් අච්චු ගහනවා කියන්නේ භාණ්ඩාගාර බිල්පත් මහ බැංකුවෙන් මිලදී ගැනීමක්. ඒක කරන්නත් රජයට ණය ගැනීමේ උපරිමය ඉහළ දාන්න වෙනවා. ණය ගැනීමේ උපරිමය ඉහළ දාන්න ජනාධිපතිවරයාට බෑ. ඒක ව්‍යවස්ථාව අනුව කළ හැකි වෙන්නේ පාර්ලිමේන්තුවට පමණයි. ඒ නිසා මැයි මාසයේ මුල විතර වෙනකොට දැනට තියෙන තත්වය අනුව භාණ්ඩාගාරයට මුදල් නැතිවෙනවා. නැවත මුදල් අර්ථසාධකයෙන් ගත්තත්, කොහෙන් ගත්තත්, මුදල් අච්චු ගැහුවත් පාර්ලිමේන්තුව නැවත කැඳවන්න සිද්ධවෙනවා.

මම හිතන්නේ මෙම අවස්ථාවේ කළ යුත්තේ සියලූම දෙනා පක්ෂ භේදයකින් තොරව එකතුවෙලා ප‍්‍රශ්නයට ඇත්ත විසඳුමක් ඉදිරිපත් කිරීම.’

Post a Comment

0 Comments